Կրթության նախարարի պաշտոնի հետ Լևոն Մկրտչյանն անհամատեղելի է. Բախշյանը հրաժարական է պահանջում
ՔաղաքականությունԿրթության նախարարի պաշտոնի հետ, փաստորեն, Լևոն Մկրտչյանն անհամատեղելի է: Այս մասին «Ազատություն» ռադիոկայանի եթերում հայտարարել է Երևանի ավագանու «Ելք» խմբակցության անդամ Անահիտ Բախշյանը՝ անդրադառնալով նրան, որ Մկրտչյանը, մահացու վրաերթի հեղինակ Հրազդանի քաղաքապետի որդուն նախագահականում ոսկե մեդալ շնորհելուն անդրադառնալով, ասել էր, որ կրթության ոլորտում երեխայի առաջադիմությունը չպետք է կապ ունենա այլ ոլորտում նրա վարքի հետ:
«Կրթության և գիտության նախարարին չի սազում այդ միտքն ասելը, իր դիրքից, իր պաշտոնից չի բխում, ինքը ԿԳ նախարարն է, ով շատ լավ պետք է իմանա, որ կրթությունը միայն ստացած թվանշանները չեն»,-ասել է Բախշյանը:
Նրա կարծիքով, կրթությունն այն արժեքներն է նաև, որ ձեւավորում է օրինապահ, հանդուրժող մարդ-քաղաքացի, որը դաստիարակվում է ընտանիքում, և որին պիտի դաստիարակի դպրոցըԼ
«Ընտանիքը չի դաստիարակել, տեսնում ենք, որովհետև եթե 16 տարեկան անչափահաս տղան առանց վարորդական իրավունքի վարում է մեքենան, խախտում է անում և մեքենայի տակ գցում է մարդուն, որը մահանում է, էլ ինչ կրթության մասին է խոսքը: Կարող է ծնողը չի էլ իմացել, չգիտեմ՝ իրենց ընտանիքում ինչ դրվածք է: Դա ինձ արդեն շատ քիչ է հետաքրքրում: Նախարարն ասում է՝ ի՞նչ է, որ պաշտոնյայի երեխա է դժբախտ պատահար չի՞ կարող լինել: Իհարկե, կարող է լինել: Բայց խոսում ենք անօրինության մասին: Խոսում ենք այն մասին, որ անչափահաս տղան առանց վարորդական իրավունքի մեքենա է վարել, մարդ է գցել մեքենայի տակ, արդյունքում մարդը մահացել է: Սա չհասկանալը և այդ պատասխանը տալը կրթության նախարարին անհամատեղելի է»,-նշել է Բախշյանը:
Անահիտ բախշյանը Լևոն Մկրտչյանի այդ հայտարարությունից հետո քաղաքացիական նախաձեռնություն է սկսում՝ նրա հրաժարականը պահանջելու. «Եթե ինքն այդքան հեշտության է խոսում դրա մասին, ուրեմն ինքը կրթության արժեքն ընդհանրապես չի կարեւորում: Ինձ համար անհասկանալի է՝ ինչո՞ւ եք այդ տղային բերել ներկայացրել պարգեւատրման»:
Հիշեցնենք, որ Գիտելիքի և դպրության օրվա կապակցությամբ 2016-2017 ուստարում բարձր առաջադիմություն ցուցաբերած դպրոցականները պարգեւատրվել էին նախագահականում, այդ թվում՝ նաեւ Ռազմիկ Դանիելյանը՝ Հրազդանի քաղաքապետի որդին: Նա հոր ծառայողական մեքենայով մահացու ելքով վրաերթի էր ենթարկել 58-ամյա քաղաքացուն: