ՆԱՏՕ–ն վերջին տարիների ընթացքում առաջին անգամ ուժեղացնում է հարավային սահմանների պաշտպանությունը
ՄիջազգայինՆեապոլում ՆԱՏՕ–ի միացյալ ուժերի հրամանատարության բազայում բացվել է հարավային ուղղությամբ իրավիճակի վերլուծության եւ ինֆորմացիայի փոխանակման համակարգման կենտրոն, հայտնում է ANSA–ն։
Այդ տեղեկությունների համաձայն՝ նոր կառույցը կզբաղվի ինֆորմացիայի հավաքմամբ, փոխանակմամբ եւ վերլուծությամբ, սպառնալիքների գնահատմամբ եւ հարավային ուղղությամբ գործողությունների համակարգմամբ։
ՆԱՏՕ–ի գլխավոր քարտուղար Յենս Ստոլտենբերգը նշել է, որ նոր կենտրոնը տեղեկությունների վերլուծության եւ փոխանակման միջոցով կնպաստի տարածաշրջանում իրավիճակի ըմբռնման բարելավմանը։
Այդ կառույցի ստեղծման մասին որոշումն ընդունվել էր փետրվարին՝ Բրյուսելում ՆԱՏՕ–ի Պաշտպանության նախարարների խորհրդի նիստի ժամանակ։ Ավելի վաղ հաղորդվում էր, որ դրա աշխատանքներին ներգրավված է լինելու մոտ 100 մարդ։
Սա վերջին տարիներին հարավային ուղղությամբ դաշինքի պաշտպանության ուժեղացմանն ուղղված առաջին իրական քայլն է։ Մինչ այդ ՆԱՏՕ–ն զբաղվում էր միայն իր արեւելյան սահմանների ամրապնդմամբ ռուսական սպառնալիքից պաշտպանվելու համար ։