Սարի թաղում անցյալ տարվա բախումները կենցաղային հիմք են ունեցել. փաստաբան
ՀասարակությունԵրեւանի Սարի թաղ թաղամասի բնակիչների եւ ոստիկանների միջեւ անցյալ տարվա բախումները կենցաղային պատճառներով էին հրահրվել: Այս մասին հուլիսի 19-ին՝ լրագրողների հետ հանդիպման ժամանակ ասաց Սարի թաղի կալանավորված բնակիչների փաստաբան Լիպարիտ Սիմոնյանը:
Փաստաբանի հավաստիացմամբ՝ Սարի թաղի բնակիչները փողոց են դուրս եկել եւ բողոքել ոչ թե ի պաշտպանություն ոստիկանության ՊՊԾ գունդը գրաված զինված խմբի անդամների գործողությունների, այլ անհանգստություն են արտահայտել գազի, ջրի եւ էլեկտրականության անջատման կապակցությամբ, որն այդ ժամանակ արդեն 2 օր շարունակվում էր: «Սարի թաղի տրանսպորտը նույնպես չի աշխատել: Այս ամենի հետեւանքով բնակիչները ստիպված էին կիլոմետրերով ճանապարհ անցնել անհրաժեշտ գնումների նպատակով խանութ հասնելու համար»,- հավելեց Սիմոնյանը:
Փաստաբանի խոսքով՝ այս բախումների հետեւանքով Սարի թաղի 10 բնակիչ է կալանավորվել: Այս մարդկանց մեղադրանք է առաջադրվել ՀՀ ՔՕ 316 հոդվածի 2-րդ մասով: «Այս հոդվածով մարդկանց մեղադրել են իրավակարգի ապահովման պետական մարմինների աշխատակիցների նկատմամբ բռնություն կիրառելու մեջ, որը սպառնացել է նրանց կյանքին եւ առողջությանը»,- պարզաբանեց փաստաբանը:
Դրա հետ մեկտեղ, ինչպես նա նշեց, կալանավորված քաղաքացիները չգիտեն, թե իրնեց կոնկրետ ինչի համար են մեղադրում, իսկ դատավարությունը մեկ տարի ձգվել է: «Դատավարություններն ընթանում են լարված մթնոլորտում, «ընդհատումներով», այդ թվում՝ նաեւ այն պատճառով, որ դատավորն արձակուրդ է գնում, իսկ կալանքի մեջ գտնվող մարդիկ ստիպված են նման դրության մեջ մնալ անորոշ ժամանակով»,- ասաց փաստաբանը՝ հավելելով, որ սա առաջացնում է Սարի թաղի կալանավորված բնակիչների հիմնավորված դժգոհությունը, քանի որ բոլորն առողջական խնդիրներ ունեն:
Լիպարիտ Սիմոնյանը հավելեց, որ դատավարության ընթացքում ոստիկանության տուժած աշխատակիցներն ի դեմս ամբաստանյալների իրենց վիրավորողներին չեն ճանաչել: