Հայրիկյանը հանդես կգա սահմանադրական փոփոխությունների նախաձեռնությամբ. «Նախագահ չի լինելու»
ՔաղաքականությունԱզգային ինքնորոշում միավորման ղեկավար Պարույր Հայրիկյանը մտադիր է հանդես գալ սահմանադրական փոփոխությունների առաջարկությամբ: Այս մասին նա նշել է այսօր՝ հուլիսի 5-ին, իր տանը կազմակերպած մամուլի ասուլիսում:
Նրա խոսքով, իրենց այդ մոտեցմանը համաձայնություն են տվել Միավորված կոմկուսը եւ Հայաստանի դեմոկրատական կուսակցությունը :
Հարցին, թե սահմանադրական ինչ փոփոխությունների մասին է խոսքը, Հայրիկյանը մանրամասնցե, որ իրենց առաջարկած սահմանադրությամբ՝ քաղաքացու դերակատարությունը պետք է ավելանա. «ԱԺ ընտրությունները լինում են կամ ընդհանուր-համամասնական, կամ միայն տեղական-օլիգարխիկ: Դա կարելի է կոչել նաեւ բազմամանդատ-մեծամասնական, ինչպես հիմա կա: Քաղաքացիներից ոչ մեկի ձայնը չի կորում: Այսինքն եթե դուք իմ օգտին քվեարկել եք, բայց ես ԱԺ չեմ անցել, ընտրություններից հետո մեկ շաբաթվա ընթացքում ես իրավունք ունեմ իմ ձայները փոխանցել ԱԺ անցած որեւէ մեկին: Պատգամավորները չեն քվեարկում մեկական ձայնով, այսինքն այնպես չի լինում, որ 50 հազար ձայն ստացած պատգամավորը եւ 5 հազար ձայն ստացած պատգամավորն ունեն հավասար ձայներ, որովհետեւ այդ դեպքում խախտվում է քաղաքացիների իրավահավասարությունը:
Երկիրը չի ունենում նախագահ, ունենում է ժողովրդի կողմից ընտրված վարչապետ, որը առաջին դեմքն է: Բայց լինում է նաեւ փոխվարչապետ: Վերին աստիճանի բոլոր դատավորները լինում են ընտրովի»:
Դժվարությունն այստեղ այն է, որ նոր սահմանադրությամբ սահմանադրական փոփոխությունների համար անհրաժեշտ է 200 հազար քաղաքացիների ստորագրությունը, սակայն սահմանադրական նորմին համապատասխան կարգավորող օրենքները դեռ չկան, երբ կլինեն այդ օրենքները, կսկեն հավաքել ստորագրությունները. «Չենք կարող ստորագրահավաք սկսել, քանի դեռ ԿԸՀ-ն մեզ չի տվել ստորագրահավաքի բլանկները, իսկ բլանկները ԿԸՀ-ն չի կարող տալ, որովհետեւ դեռ նման լիազորություն չունի»: