Առողջապահության ոլորտում գնագոյացման սկզբունքը կվերանայվի. նախարար
ՔաղաքականությունԱռողջապահության ոլորտում ծախսերի արդյունավետությունը մեծացնելու համար նախարարությունը ծրագրում է փոփոխություններ կատարել բժշկական ծառայությունների գնագոյացման գործընթացում եւ նեղացնել այն անձանց շրջանակը, որոնք արտոնյալ ծառայությունների իրավունք ունեն: Այս մասին առողջապահության նախարար Լեւոն Ալթունյանը հայտարարեց ԱԺ Առողջապահության եւ սոցիալական հարցերով մշտական հանձնաժողովում 2016-ի բյուջեի կատարողականի հաշվետվության քննարկման ժամանակ: Նա հավելեց, որ կառավարության թիվ 318 որոշման մեջ փոփոխությունները գործադիրի քննարկմանը կներկայացվեն հոկտեմբերին:
Լեւոն Ալթունյանի պարզաբանմամբ` նախարարության անցկացրած վերլուծությամբ պարզվել է, որ եթե Երեւանի հիվանդանոցներում վիրաբուժական ակտիվությունը կազմում է 67-70 տոկոս, ապա մարզերում այն կազմում է 17 տոկոս: Մնացյալը թերապեւտիկ հիվանդներն են, որոնք ստացիոնար բուժման կարիք չունեն: «Մենք այստեղ ենք տեսնում միջոցների կորստի հիմնական տեղերը»,- ասաց նա:
Նախարարի խոսքով` այնուհետեւ պարզվել է, որ եթե 12 հիվանդների որեւէ բժշկական ծառայություն մատուցելու համար բավական է մեկ բժիշկը, մեզ մոտ 4,5-5 բժիշկ է: Այստեղից էլ առաջանում է բժիշկների շատ ցածր զբաղվածությունը եւ ցածր ՕԳԳ-ն: Այնուամենայնիվ, ըստ փորձագիտական գնահատականների, Հայաստանի առողջապահության ամբողջ ոլորտի համար տարեկան մոտ 260 մլրդ դրամ է պահանջվում:
«Մի կողմից համադրելով ունեցած 75 մլրդ-ը եւ անհրաժեշտ 260 մլրդ-ը` մենք տեսնում ենք, որ անհրաժեշտից 3,5-4 անգամ պակաս գումար ունենք: Մյուս կողմից` 75 մլրդ-ի 30-35 տոկոսը մենք ոչ արդյունավետ ենք ծախսում»,- ասաց նախարարը: Նրա խոսքով` 318 որոշման մեջ այս կամ այն ծառայության արժեքի հաշվարկի համար նոր բանաձեւ կմտցվի, ինչպես նաեւ կկրճատվի այն անձանց ցանկը, որոնք պետական պատվերի շրջանակում բուժվելու իրավունք ունեն:
«Մենք պետք է հայտարարենք, որ չենք կարող ամբողջ բնակչությանը սպասարկել: Մենք պետք է կենտրոնանանք հասարակության սոցիալապես անապահով շերտերի վրա: Հունվարից նախատեսվում է 600 հազար անապահով քաղաքացիներին պետական ապահովագրության պոլիս տրամադրելու պիլոտային ծրագիրը»,- հավելեց նա: