Թեհրանում ավարտվել է Իրանի խորհրդարանում ահաբեկիչների ոչնչացման գործողությունը (ֆոտո)
Ուշադրության կենտրոնումԹեհրանում ավարտվել է Իրանի խորհրդարանի շենքում ահաբեկիչների ոչնչացման գործողությունը: Այս մասին հաղորդում է ԻՌՆԱ-ն: Խորհրդարանի եւ Իմամ Խոմեյնիի դամբարանի վրա հարձակումների հետեւանքով 12 մարդ է զոհվել, 42 վիրավոր կա:
Խորհրդարան ներխուժած չորս ահաբեկիչներից մեկը շենքի չորրորդ հարկում պայթեցրել է իրեն, մնացյալները սպանվել են Իսլամական հեղափոխության պահապանների կորպուսի աշխատակիցների կողմից:
Պաշտոնական տվյալներով՝ Իմամ Խոմեյնիի դամբարանի տարածքում հարձակումն իրականացրել են երկու զինյալներ: Նրանք զինված են եղել հրազենով, նաեւ մահապարտի գոտիներ են կրել:
Փոխհրաձգության ընթացքում կին ահաբեկիչը պայթեցրել է մահապարտի գոտին, երկրորդը փորձել է փախուստի դիմել, բայց ոստիկանները կարողացել են չեզոքացնել նրան ու խանգարել են պայթեցնել ռումբը:
Ոչ պաշտոնական աղբյուրների հաղորդմամբ՝ հարձակվողները երեքն են եղել, որոնցից մեկը թույն է ընդունել՝ ձերբակալվելուց խուսափելու համար:
Նշենք, որ Թեհրանում մի քանի հարձակում է իրականացվել. մի խումբ զինված անձինք կրակ են բացել խորհրդարանի շենքում, մյուսներն էլ՝ Իմամ Խոմեյնիի դամբարանի այցելուների ուղղությամբ: Ահաբեկիչները խորհրդարան են մտել կանացի հագուստով:
ԻՊ-ն ստանձնել է ահաբեկչությունների պատասխանատվությունն ու Իրանի խորհրդարանի վրա հարձակման տեսանյութ հրապարակել: