Անի Հովհաննիսյանի կողմից երբեւիցե գումարային պահանջ չի եղել. Տիգրան Ուրիխանյանի նախկին օգնականը հարցաքննվել է
Հասարակություն«Անալիտիկ» կայքի տնօրեն Անի Հովհաննիսյանի գործով դատական նիստին հարցաքննվել է ԱԺ պատգամավոր Տիգրան Ուրիխանյանի նախկին օգնական Սարգիս Հարությունյանը: NEWS.am-ի հետ զրույցում Անի Հովհաննիսյանի շահերի պաշտպան Լիպարիտ Սիմոնյանը նշեց, որ Սարգիս Հարությունյանը նիստի ընթացքում նշել է, որ Անի Հովհաննիսյանի կողմից անձամբ գումարի պահանջի մասին խոսքեր չի լսել: Լիպարիտ Սիմոնյանի խոսքով, Սարգիս Հարությունյանի վկայությունը դրվել է Անիի մեղադրանքի հիմքում:
«Վկան հայտնեց, որ Անի Հովհաննիսյանի կողմից երբեւիցե գումարային պահանջ չի եղել, ավելին, երբ ինքը գումարի մասին խոսել է, Անին դրական պատասխան չի տվել, իսկ գաղտնի արված ձայնագրության բովանդակությունից հայտնի է դառնում, որ Անի Հովհաննիսյանը հարցնում է, թե նյութերը երբ կուղարկվեն: Այստեղ խոսքը համագործակցության մասին է»,-ասաց նա:
Նշենք, որ քրեական գործով հաջորդ նիստին ԱԺպատգամավոր Տիգրան Ուրիխանյանը, որը գործով տուժող է, հնարավոր է ներկայանա նիստին:
Ըստ մեղադրական եզրակացության` Անի Հովհաննիսյանը շորթում կատարելու ուղղակի դիտավորությամբ «Analitik.am» լրատվական կայքի գովազդի գծով պատասխանատու Ինգա Կիրակոսյանին օգտագործելու միջոցով, որը հանցանքը կատարել է անզգուշությամբ, կատարել է խոշոր չափերով շորթում` «ՎՏԲ Հայաստան բանկ» ՓԲ ընկերության օրինական շահերին էական վնաս պատճառող տեղեկություններ հրապարակելով եւ նման տեղեկություններ հրապարակելու սպառնալիքով հիշյալ ընկերությունից մարտի 15-ին պահանջել է 1 մլն դրամ: Բացի դրանից, նա պատգամավոր Տիգրան Ուրիխանյանի եւ նրա կնոջ մասին արատավորող տեղեկություններ: Տիգրան Ուրիխանյանը հանդիպել է Անի Հովհաննիսյանին, որն էլ նշել է, թե համապատասխան վերաբերմունք է անհրաժեշտ նմանատիպ հոդվածների հրապարակումները դադարեցնելու համար: Օրեր անց Անի Հովհաննիսյանը պատգամավորից պահանջել է 300 հազար դրամ, որն օրեր անց նրա աշխատակից Վարդիթեր Գիշյանը ստացել է:
Անի Հովհաննիսյանին մեղադրանք է առաջադրվել Քրեական օրենսգրքի 182-րդ հոդվածի 1-ին եւ 2-րդ մասով: Նա կալանավորված է: