Կոալիցիան մեղմում է Սիրիայի ժողովրդի տառապանքը
ՎերլուծությունPast.am-ը գրում է.
Երեկ, հիմնվելով SMART գործակալության վիդեոնյութի վրա, «Փաստը» գրել էր, որ ԱՄՆ–ի և Բրիտանիայի 150 զինվորներ, Ջեյշ Մուհավար ալ–Թուրայի (սրանք մաս են կազմում նաև Թուրքիայից հովանավորվող Սիրիական ազատ բանակին) ջիհադիստների ուղեկցությամբ, հատել էին սիրիական սահմանը՝ հայտնվելով սիրիական Խամիմ քաղաքում, որը Պալմիրայից 90կմ արևելք է գտնվում: Հաշվի առնելով այն հանգամանքը, որ քաղաքը շատ մոտ է այս պահին բոլորի համար ցանկալի հանգրվան Դեյր–էզ–Զորին և Իրաքին սահմանակից, ռազմավարական նշանակություն ունեցող Աբու–Քեմալին, նաև կասկածներ էինք հայտնել այս ձեռնարկի հակաահաբեկչական կոնտեքստի առումով և կանխատեսել էինք, որ այժմ զինված ընդդիմությունը, Իսրայելի Հորդանանի (արաբական աշխարհի հակաիրանական ու հակաասադական բռնապետներին նույնպես նկատի առեք) և Կոալիցիայի հետ մեկտեղ, ամեն բան անելու են հատկապես Ասադի կառավարական բանակի առաջխաղացումը խանգարելու և Հըզբոլլահին ու իրանական ուժերին այս հատվածում ջախջախելու համար՝ չթույլատրելով նրանց մուտքը ապառազմականացված անվտանգության գոտիներ:
Եվ, խնդրեմ, ընդամենը ժամեր անց Ռոյթըրզը հղում անելով ամերիկյան ռազմական աղբյուրներին տեղեկացրեց, որ Կոալիցիան, ճիշտ հորդանանա–սիրիական սահմանին գտնվող Աթ–Թանֆ քաղաքի շրջանում, ռմբակոծել է սիրիական բանակի ավտոշարասյունը: Իբր՝ այն պատճառով, որ մեքենաներում իրանցի կամ Իրանի կողմից ֆինանսավորվող զինյալներ են եղել: Ռոյթըրզը հայտնել է, որ որոշման հեղինակը Նահանգների հրամանատարն է եղել, որին հետախուզական աղբյուրներից հայտնի է դարձել, որ կառավարական բանակը պատրաստվում է հարվածել իր կողմից հովանավորվող և Հորդանանի ճամբարներում մարզվող Ջեյշ Մուհավար ալ–Թուրային: Ռոյթըրզը, իհարկե, անուններ չի տալիս, այլ ասում է՝ Վաշինգտոնի կողմից պաշտապնվող չափավոր ընդդիմություն, բայց պարզից էլ պարզ է, որ ամերիկյան սպաներն առնվազն հորդանանյան իրենց ուղեկիցների ու տեղի վերահսկելի ահաբեկիչների անվտանգությունն են փորձել ապահովել: Եթե, իհարկե, սիրիական ուժերի ռազմական օպերացիայի մասին հետախուզական տվյալներն էլ կեղծիք չեն:
Այս տեղեկությունն, ի դեպ, հաստատեցին նաև սիրիական աղբյուրները: Մասնավորապես՝ ՍԱՆԱ գործակալությունն արևելյան զգացմունքայնությամբ ու պերճախոսությամբ է մեջբերել անանուն իր աղբյուրին, ըստ որի՝ այս հարձակումը մերկացնում է Կոալիցիայի՝ ահաբեկչության դեմ պայքարի կեղծիքը և բացահայտում է տարածաշրջանում սիոնիստա–ամերիկյան պլանների ինչ լինելը: Ընդ որում, աղբյուրը հարձակման այլ բացատրություն է մեջտեղ բերում՝ հղված Պենտագոնից: Ըստ այդմ՝ ռմբակոծումից առաջ սիրիական բանակը նախապես զգուշացվել է այս հատվածում չառաջանալու մասին և նոր միայն պատժվել: Գործակալության փոխանցմամբ՝ սա սկզբունքորեն է անընդունելի, որովհետև սիրիական բանակն իր երկրում ու իր տարածքում է պայքարում ահաբեկչության դեմ, և ոչ ոք իրավունք չունի նրանց դեմ անցկացվող ռազմական օպերացիաների ուղղությունն ու ընթացքը որոշել:
Ի դեպ, սիրիական աղբյուրները թվեր չհայտնելով՝ հաղորդում են, որ ռմբակոծման արդյունքում բավական սիրիացի զինվորականներ են զոհվել: Ռուսաստանի ԱԳ նախարարությունից էլ դատապարտելով կատարվածը՝ հայտարարել են, որ սիրիական բանակին հարվածից մեկ օր առաջ Կոալիցիան հարվածել է նաև տեղի խաղաղ բնակիչներին, ինչը չի նպաստում Սիրիայում բարենպաստ քաղաքական իրադրության ստեղծմանը:
Գոհար Սիմոնյան