Ռոհանին Իրանի նախագահ է վերընտրվել
ՔաղաքականությունԻրանի գործող նախագահ Հասան Ռոհանին հաղթել է ընտրություններում ու վերընտրվել պետության ղեկավարի պաշտոնում։ Այս մասին հայտնում է Associated Press-ը ՝ վկայակոչելով Իրանի ՆԳՆ տվյալները։
ՆԳՆ-ի տվյալներով, Ռոհանին ստացել է ձայների 59 տոկոսը՝ այսինքն նրան աջակցել է 22 մլն 800 հազար ընտրող։ Նրա մրցակից Էբրահիմ Ռաիսիի օգտին է քվեարկել 39 տոկոսը։
Ընդամենը Իրանի ընտրություններին քվեարկել է 40 մլն քաղաքացի, այսինքն մասնակցությունը գերազանցել է 70 տոկոսը։ Առաջին փուլում հաղթելու համար թեկնածուն պետք է ստանար ձայների ավելի քան 50 տոկոսը։
Իրանի 68-ամյա նախագահը կողմ է ավելի ազատական բարեփոխումներին ու խոստանում է ավելի շատ քաղաքական ազատություններ, նաեւ մտադիր է լավացնել հարաբերությունները այլ պետությունների հետ։
Իր լիազորություններով Իրանի նախագահը զիջում է միայն երկրի հոգեւոր առաջնորդին՝ այաթոլա Ալի Համենեիին, որին փորձագետների խորհուրդն է ընտրում։