ՌԴ-ն իրեն իրավունք է վերապահում կապեր պահպանել Սիրիայի քրդական ստորաբաժանումների հետ. Պուտին
Ուշադրության կենտրոնումՌուսաստանն իրեն իրավունք է վերապահում աշխատանքային կապեր պահպանել Սիրիայում քրդական ստորաբաժանումների հետ, քանի որ նրանք պայքարում են ահաբեկիչների դեմ, սակայն Մոսկվան քրդերին զենք չի մատակարարում։ Այս մասին լրագրողներին հայտարարել է Ռուսաստանի նախագահ Վլադիմիր Պուտինը՝ մեկնաբանելով սիրիացի քրդերի հետ ռուս զինծառայողների կապերի մասին հաղորդագրությունները, հաղորդում է «ՏԱՍՍ»-ը։
«Քանի որ քրդական գործոնն իրական գործոն է Սիրիայի իրավիճակում եւ քրդական խմբավորումները մասնակցում են, այսես կոչված, «Իսլամական պետության» դեմ ռազմական գործողություններին, մենք մեզ իրավունք ենք վերապահում նրանց հետ աշխատանքային կապեր պահպանել՝ թեկուզ հնարավոր բախումներից ու իրավիճակներից խուսափելու համար, որոնք մեր զինծառայողների համար կարող են սպառնալիքներ ստեղծել», -ասել է ՌԴ առաջնորդը։
Նա ընդգծել է, որ Ռուսաստանը սիրիացի քրդերին զենք չի մատակարարում։ «Այստեղ ոչ մի գաղտնիք չկա, ի տարբերություն մյուս երկրների՝ մենք չենք հայտարարում քրդական խմբավորումներին զենք մատակարարելու մասին։ Բացի այդ, նրանք առանձնապես մեր մատակարարումների կարիքը չունեն, նրանք այդ զենքը ստանալու այլ աղբյուրներ ունեն, մենք չենք կարծում, որ որեւէ կերպ պետք է ակտիվացնել այդ աշխատանքը»,-ասել է Պուտինը։
Նա նշել է, որ այդ հարցը քննարկել է Թուրքիայի նախագահ Ռեջեփ Թայիփ Էրդողանի հետ, ով իր մտահոգությունն է հայտնել դրա շուրջ։ «Ես չեմ կարծում, որ այս հարցը կարող է մեր թուրք գործընկերների մտահոգության պատճառ դառնալ, մենք կապ են պահպանում, մեր դիրքորոշումը բաց է եւ հույս ունեմ, հասկանալի կլինի նաեւ մեր թուրք գործընկերներին», -ասել է ՌԴ նախագահը։ Պուտինն ասել է նաեւ, որ Էրդողանի հետ քննարկել է Սիրիայի քրդերին ԱՄՆ-ի զենք մատակարարելու հարցը, ինչի շուրջ Թուրքիայի նախագահն իր մտահոգությունն է հայտնել։ «Մենք նման բան չենք անում»,-եւս մեկ անգամ ընդգծել է Պուտինը։