ՌԴ դեսպանը դատապարտել է ադրբեջանական զինուժի կողմից «Շանթ»-ի նկարահանող խմբի գնդակոծությունը
ՄիջազգայինՀայաստանում Ռուսաստանի դեսպան Իվան Վոլինկինը դատապարտել է ադրբեջանական ԶՈՒ-ի կողմից «Շանթ» հեռուստաընկերության նկարահանող խմբի ավտոմեքենայի գնդակոծության միջադեպը: Այս մասին դեսպանը հայտարարել է լրագրողների հետ զրույցում:
«Երբ ոտնահարվում է մարդասիրական իրավունքը, կարծում եմ՝ առողջ դատողությամբ որեւէ անձ չի կարող չդատապարտել դա: Լրագրողները, բժիշկներն ու խաղաղ մասնագիտություն ունեցող այլ անձինք չպետք է հակամարտող կողմերի կրակի տակ հայտնվեն: Դա, իհարկե, տհաճ իրադարձություն է եւ պետք է դատապարտվի»,- նշել է դեսպանը:
Ինչ վերաբերում է շփման գծում իրադրությանը, ապա ռուսաստանցի դիվանագետը նշել է. «Մենք տեսնում ենք, որ պարբերաբար փոխհրաձգություն է տեղի ունենում, բախումներ, մարդիկ են զոհվում: 21-րդ դարում դա անթույլատրելի է: Այն առաջարկները, որոնք մշակվել են Վիեննայում եւ Սանկտ Պետերբուրգում՝ ուղղված հակամարտության գոտում անվտանգության ամրապնդմանը, պետք է կյանքի կոչվեն»:
Հիշեցնենք, որ նկարահանող խմբի ավտոմեքենայի գնդակոծության հետեւանքով վիրավորվել է հեռուստաընկերության օպերատոր Դավիթ Աթոյանը: