ԱՄՆ-ը մտադիր է ամրապնդել Եգիպտոսի հետ համագործակցությունը պաշտպանության ոլորտում
ՄիջազգայինԱՄՆ-ը մտադիր է ամրապնդել Եգիպտոսի հետ հարաբերությունը պաշտպանության ոլորտում` ահաբեկչական սպառնալիքին հակազդելու համար: Այս մասին Կահիրեում հայտարարել է Պենտագոնի ղեկավար Ջեյմս Մեթիսը, հաղորդում է «Սինխուա»-ն:
Համաձայն Եգիպտոսի նախագահի նստավայրի հրապարակած հայտարարության` Եգիպտոսի նախագահ Աբդել Ֆաթահ աս-Սիսիի հետ հանդիպման ժամանակ Մեթիսը նշել է, որ ամերիկյան վարչակազմն աջակցում է եգիպտական կառավարության միջոցառումներին` ահաբեկչության դեմ պայքարում, մտադիր է ամրապնդել Եգիպտոսի հետ համագործակցությունը տարբեր ոլորտներում, մասնավորապես` պաշտպանության ոլորտում փոխգործակցությունը բարձրացնել ավելի բարձր մակարդակի` Մերձավոր Արեւելքում եւ աշխարհում ներկա մարտահրավերներին հակազդելու նպատակով:
Եգիպտոսի նախագահն ընդգծել է, որ ահաբեկչության դեմ պայքարի բանալին ահաբեկչական խմբավորումների ֆինանսավորման աղբյուրները «չորացնելն» է: