Մոսկվան խնդիրներ չի տեսնում Աբխազիայով դեպի Հայաստան տրանզիտը վերականգնելու հարցում. Լավրով
Ուշադրության կենտրոնումՌուսական կողմը ոչ մի խնդիր չունի, որ Աբխազիայով դեպի Հայաստան ու Վրաստան բեռների տարանցումը վերականգնվի։ Այս մասին հայտարարել է ՌԴ ԱԳ նախարար Սերգեյ Լավրովը՝ Աբխազիայի նախագահի հետ մամուլի ասուլիսի ժամանակ՝ պատասխանելով այն հարցին, թե արդյոք Ռուսաստանը շահագրգռված է Աբխազիայից Հայաստան բեռների տարանցման վերականգնման հարցում, հաղորդում է «Sputnik Աբխազիա»-ն։
Նախարարը նշել է, որ Ռուսաստանի կողմից հարցը լուծելու հետ կապված խնդիրներ չկան։
Նրա խոսքով՝ դրա համար նույնիսկ իրավական հիմք կա։ «Դրանք պայմանավորվածություններն են, որոնք ձեռք են բերվել Ռուսաստանի Դաշնության եւ Առեւտրի համաշխարհային կազմակերպության միջեւ 2011 թվականին»։
«Մենք գիտենք, որ մեր հայ գործընկերները շահագրգռված են տարանցման վերականգնման հարցում։ Այսօր Աբխազիայի նախագահն ասել է, որ ինքը դեմ չէ դրան։ Այդ պատճառով էլ դա արդեն մեզանից կախված չէ, այլ մյուս երկրներից, որտեղ տարանցումը պետք է լինի»,-հավելել է նախարարը։
Աբխազիայի նախագահ Ռաուլ Խաջիմբայի խոսքով՝ երթուղու բացումը դրական ազդեցություն կունենա երկրի տնտեսության վրա։ «Դա կօգնի ունենալ լրացուցիչ միջոցներ, ես չեմ կասկածում, որ գործընթացի հարցը կարող է լուծվել»,-ասել է նա։