Վիգեն Սարգսյան. Արցախյան համակարտության գոտում պատերազմի վերսկսման հնարավորությունը զրոյից 100 տոկոս է
ՔաղաքականությունԱրցախյան հակամարտությունը ժողովրդի ինքնորոշման համար պայքարի տիպիկ դեպք է։ Այս մասին հայտարարել է ՀՀ պաշտպանության նախարար Վիգեն Սարգսյանը՝ ռուս լրագրողների հետ հանդիպման ընթացքում։
Նա նշել է, որ հայկական կողմերը բաց են բանակցային գործընթացի համար։ Սակայն Սարգսյանն ընդգծել է, որ խնդրի լուծումը կապված է ժողովրդի ինքնորոշման իրավունքը ճանաչելու ու հարգելու հետ, մյուս բոլոր հարցերը ծագում են դրանից։
«Դրանք պետք է լուծվեն ՝հաշվի առնելով Արցախի Հանրապետության ժողովրդի անվտանգության ապահովումը եւ ինքնորոշման նրա իրավունքը», -նշել է պաշտպանության նախարարը։
«Դժբախտաբար, ԵԱՀԿ Մինսկի խմբի անդամների փորձերը պարբերաբար ձախողվում են Ադրբեջանի կողմից, որը նապատակուղղված չէ հակամարտության լուծում որոնելուն։ Բաքուն երկարաձգում է հակամարտության լուծումը՝ մեծացնելով սպառազինությունը, օգտագործելով հակահայկական, հայատյաց հռետորաբանություն բոլոր մակարդակներում՝ մինչեւ պետության ղեկավարի։ Նման մթնոոլորտում հասարակությանը նախապատրաստել Արցախի շուրջ զիջումների ուղղակի անհնար է։
Մենք չենք հոգնի աշխատել խաղաղության շուրջ, բայց մենք պետք է պատրաստ լինենք իրադարձությունների ցանկացած զարգացմանը, քանի որ Ադրբեջանում ամբողջությամբ բացակայում է զինված ուժերի նկատմամբ ժողովրդավարական ու քաղաքացիական վերահսկողության համակարգը, իսկ դա նշանակում է, որ մարտական գործողությունների գոտում ռազմական գործողությունների վերսկսման հնարավորությունը կարելի է գնահատել զրոյից 100 տոկոս, քանի որ նման որոշումը ոչնչով պայմանավորված ու սահմանափակված չէ։ Ցանկանում եմ հուսալ, որ Բաքվում հասկանում են, որ ցանկացած սրացում կարող է հանգեցնել լայնածավալ պատերազմի, ինչը քաոս կհրահրի, բայց չի լուծի արցախյան խնդիրը։ Քանի որ այդ հարցը ռազմական լուծում չունի», - եզրափակել է նա։