Եթե ընտրությունները եկող կիրակի լինեին, «Ծառուկյան» դաշինքը ՀՀԿ–ից 4%–ով ավելի ձայն կհավաքեր. «Փաստ»
Մամուլ«Փաստ» օրաթերթը գրում է.
Խորհրդարանական ընտրություններին ընդառաջ Gallup International–ի հայաստանյան ներկայացուցչության հետազոտության համաձայն, եթե ԱԺ ընտրությունները տեղի ունենային առաջիկա կիրակի օրը, ապա «Ծառուկյան» դաշինքը, որը հավաքել է ամենաշատ՝ 26,4%–ը, կհայտնվեր առաջատարի դիրքերում: ՀՀԿ–ի օգտին քվեարկելու պատրաստակամություն էր հայտնել հարցվածների 22,8%–ը:
Երկու ֆավորիտներից հետո ձայների 4,3%–ով երրորդ տեղում է «Ելք» դաշինքը, իսկ ՀՅԴ–ի օգտին քվեարկելու ցանկություն է հայտնել հարցվածների ընդամենը 3,9%–ը:
«Ազատ դեմոկրատներին» նախապատվություն է տվել 3,4%–ը: ՀՎԿ–ին բաժին է հասել ձայների 2,7%–ը: Չնչին տարբերությամբ՝ 2,6%–ով ՀՎԿ–ին հաջորդում է «ՀԱԿ–ՀԺԿ» դաշինքը: Վերջին երկու տեղերը, զբաղեցրել են «ՕՐՕ» դաշինքը և ՀԿԿ–ն՝ համապատասխանաբար ստանալով ձայների 1,8% և 1%–ը:
ԱԺ «Բարգավաճ Հայաստան» խմբակցության ղեկավար Նաիրա Զոհրաբյանը, ով նաև զբաղեցնում է «Ծառուկյան» դաշինքի ընտրացուցակի 3–րդ համարը, «Փաստի» հետ զրույցում նշեց, որ իրականում իրենց օգտին տրված վստահության քվեն շատ ավելի բարձր է, քան հարցման ժամանակ արձանագրված ցուցանիշն է:
«Ես այս պահին Տավուշի մարզի Հաղթանակ գյուղում եմ: Մեր քարոզչական խմբերը քարոզարշավի մեկնարկից մինչ այս պահը արդեն իսկ հասցրել են լինել ավելի քան 60 համայնքում, և կարող եմ ասել, որ հասարակությունը միայն մեկ անուն՝ Գագիկ Ծառուկյանի անունն է տալիս: Ես խնդրում եմ, որ որևէ քաղաքական կուսակցության կամ դաշինքի ներկայացուցիչ չնեղանա, բայց ես վստահ եմ, որ մեր հաղթանակը լինելու է շատ բարձր վստահության քվեով»,– ասաց Ն. Զոհրաբյանը:
Նա նաև նշեց, որ իրենց հաղթանակի առանցքում Գագիկ Ծառուկյանն է ու նրա շուրջ համախմբված թիմը, իսկ ժողովրդի այն ոգևորությունն ու հուզմունքը, որը կա, բառերով փոխանցել հնարավոր չէ:
«Տեսնելով ժողովրդի նման հուզմունքը, ես նույնպես շատ հուզված եմ, սակայն մենք մեր ընտրողին մեկ բան ենք ասում՝ ի տարբերություն տարբեր «գաստրոլյոր» քաղաքական ուժերի, մենք մեր ընտրողի ու քաղաքացու աչքերին նայելու ենք ամեն օր»,– ասաց Ն. Զոհրաբյանը:
ԱԺ փոխնախագահ Էդուարդ Շարմազանովը, ով ՀՀԿ նախընտրական ցուցակի 7–րդ հորիզոնականն է զբաղեցնում, «Փաստի» հետ զրույցում նշեց, որ ՀՀԿ–ի օգտին տրված 22,8%–ի ցուցանիշը, իր կարծիքով, շատ այլ բաների մասին է նաև խոսում:
«Ընդհանուր առմամբ պարզ էր, որ ՀՀԿ–ն և «Ծառուկյան» դաշինքն են առաջատարները, որը նույնիսկ անզեն աչքով է երևում: Նույն Gallup International–ի հարցումների արդյունքներով 82,2%–ը ցանկանում է, որ ընտրություններից հետո Կարեն Կարապետյանը շարունակի պաշտոնավարել վարչապետի պաշտոնում: Այսինքն՝ հաշվի առնելով, որ Կարեն Կարապետյանը ՀՀԿ առաջին տեղակալն է և ՀՀԿ–ի վարչապետի թեկնածուն, բնականաբար, մեծ հիմք ենք տեսնում, որ լավ աշխատանքի դեպքում Հանրապետականը կհասնի հաջողության և ապագայում Կարեն Կարապետյանի գլխավորությամբ կրկին կառավարություն ձևավորելու հնարավորություն կունենա»,– ասաց Է. Շարմազանովը:
ԱԺ փոխնախագահը նշեց նաև, որ բոլոր 8 կուսակցություններին ու դաշինքներին իրենք հարգանքով ենք վերաբերվում և բոլորին ազատ ու արդար մրցապայքար են մաղթում: Բացի այդ, կարևորում են նաև, որ քարոզարշավն արդար ու կոռեկտ ընթանա, իսկ հաջողության հասնեն այն ուժերը, ում ժողովուրդը կվստահի:
Խոսելով ՀՀԿ–ից 4%–ով ավել ստացած «Ծառուկյան» դաշինքի ձայների մասին Է. Շարմազանովը նշեց, որ իր կարծիքով այն ոչ թե դաշինքի թիմի, այլ Գագիկ Ծառուկյանի անձնական վարկանիշն է, որը ՀՀԿ–ի վարչապետի թեկնածուի անձնական վարկանիշից ավելի ցածր է:
ՀՎԿ խոսնակ Էդգար Առաքելյանը, ով կուսակցության նախընտրական ցուցակի 6–րդ համարն է, «Փաստին» ասաց, որ չի ցանկանում խոսել հարցման արդյունքների մասին, քանի որ ինքը նման հարցումների ընդհանրապես չի հավատում:
«Շատ է պատահել, որ ընտրությունների արդյունքները 180 աստիճանով տարբերվել են նախնական հարցման արդյունքներից»,– ասաց Է. Առաքելյանը:
Այսպիսով, արձանագրենք, որ թեև նոր է մեկնարկել պաշտոնական նախընտրական քարոզարշավը, սակայն թեկնածուների միջև լարվածությունն ավելի վաղ էր սկսվել: Հաշվի առնելով թեկնածուների ու նրանց համախոհների միջև արդեն իսկ տեղի ունեցած դանակահարությունների դեպքերը միանշանակ կարելի է պնդել, որ պայքարը բավականին թեժ է լինելու: Իսկ քաղաքական կուսակցություններն ու դաշինքները որքան էլ հարցման արդյունքներին թերահավատորեն վերաբերեն, այնուամենայնիվ, ընդգծենք, որ այս պահի դրությամբ առաջին տեղում «Ծառուկյան» դաշինքն է:
Շարունակությունը` «Փաստ» օրաթերթի այսօրվա համարում:c