Վիճել են, գյուղացիները վախեցել են մոտենալ, մեկ էլ տեսել են` վիզը կտրել է. մանրամասներ Արագածոտնի դաժան սպանությունից
ՀասարակությունԻնչպես հաղորդվել էր ավելի վաղ, Արագածոտնի մարզի Թլիկ գյուղում հայտնաբերվել է 20-ամյա տղայի դի՝ պարանոցը մի քանի տեղից կտրած։ Ժամը 17։30-ի սահմաններում ոստիկանության Թալինի բաժին ահազանգ է ստացվել , որ Երևան-Գյումրի ավտոճանապարհի Թլիկ գյուղի վարչական տարածքում՝ ձնակույտում հայտնված Mercedes կա, իսկ մեքենայից քիչ այն կողմ` տղամարդու դի կա։ Ոստիկաններն ու քննիչները Mercedes մակնիշի ավտոմեքենայի մոտ հայտնաբերել են պարանոցը կտրած տղամարդու դի։
Ինչպես նշել է Թլիկի գյուղապետ Սլավիկ Սալոյանը, սպանությունը տեղի է ունեցել գյուղամիջում` մարդկանց աչքի առաջ։
Նրա խոսքով, տղային, որը վարորդ է եղել, սպանել է հաճախորդը, հաղորդում է tert.am–ը։
«Տաքսու վարորդ է եղել, հաճախորդին պետք է հասցներ Լենինական, վիճաբանություն է եղել մեքենայի մեջ, վախից քշել է գյուղ, գյուղացիները վախեցել են մոտենալ ու մեկ էլ տեսել են, որ վիզը կտրել, գցել է», – մանրամասնել է գյուղապետն ու ավելացրել, որ հանցագործը թարմ հետքերով բռնվել է:
«Շներին բաց թողեցինք, հետքերով բռնեցին, փորձել էր դաշտերով փախնել»,-նշել է գյուղապետը:
Հանցագործը պատմել է, թե, իբր, սպանվածն է իրեն ագրեսիվ պահել, դանակ է պահել, ինքը խլել է, պաշտպանվել ու ստիպված ինքը հարվածներ է հասցրել:
Սպանություն կատարած անձը պատմել է, որ մեկնում էր Գյումրի՝ մորն այցելության:
Ըստ գյուղապետի, տաքսու հաճախորդը նախկինում դատապարտված է եղել ՔՕ 268-րդ հոդվածով (թմրամիջոցների կամ հոգեներգործուն նյութերի ապօրինի շրջանառությունն առանց դրանք իրացնելու նպատակի)