Ալիկ Սարգսյանի ողբերգական դեմարշը
ՎերլուծությունԽորհրդարանական ընտրություններին ընդառաջ ենթադրելի էր, որ Հանրապետականը ավանդույթի համաձայն, կիրառելու է ձեռքի տակ եղած բոլոր հնարավոր ու անհնար ռեսուրսները։ Իսկ այդ ռեսուրսների պակաս իշխանությունը չունի՝ սկսած վարչական լծակներից վերջացրած ֆինանսներով, սակայն ամենահետաքրքիրն այն էր, որ որոշա տարածքներում հանրապետականը փորձում է վերակենդանացնել երկրի հասարակական քաղաքական կյանքի լուսանցքում գտնվող մի շարք նվիրյալների։ Հենց այս տրամաբանությամբ կարծես թե թիրախ է ընտրվել Արարատի մարզը, որտեղ նախ մարզպետ նշանակվեց բնապահապանության նախկին նախարար Արամայիս Գրիգորյանը, ապա Հանրապետականի մարզային կառույցի ղեկավար նշանակվեց նախկին ոստիկանապետ Ալիկ Սարգսյանը։
Վարչակարգը ինչպես ասում են, երբեք չի մոռանում իր նվիրյալներին, սակայն այդ նվիրյալներն իրենց հերթին այդպես էլ ոչինչ չեն սովորում։ Գրիգորյանն իր պոստում կարճաժամկետ պաշտոնավարումից հետո արդեն հայտնվեց սկանդալների կենտրոնում՝ կապված Արտաշատի պոլիկլինիկայի տնօրենի նկատմամաբ վարչական ճնշումների ու սպառնալիքների հետ։
Այս միջդեպին անդրադարձավ նաև վարչապետ Կարեն Կարապետյանը, որը կառավարության նիստերից մեկի ժամանակ նման գործելակերպը որակեց որպես արջի ծառայություն Հանրապետականին, և նշեց, որ նման վարքագիծ դրսևորող չինովնիկները խստագույնս կպատժվեն։ Սակայն պարզվում է, որ մի շարք կուսակցական չինովնիկներ լուրջ չեն վերաբերվում այս զգուշացումներին կամ էլ գուցե կուրացել են վարչակարգին ու Հանրապետականին իրենց անսահման հավատարմությունը ցուցադրելու անդիմադրելի պահանջից և շրջանցում են վարչապետի այս զգուշացումները։
Թերևս հենց այսպես կարող ենք գնահատել Ալիկ Սարգսյանի գործելակերպը։ Նախկին ոստիկանապետը, որը վերջին տարիներին փաստացի մեկուսացած էր իշխանությունից և ակտիվություն չէր ցուցաբերում, գլխովին նետվել է նախընտրական քարոզչության ու գործընթացների մեջ՝ դեռ պաշտոնական քարոզարշավը չմեկնարկած։ Օրերս Սակայն Ալիկ Սարգսյանը հայտնվեց մի ողբերգական իրադարձության կենտրոնում։ Հայաստանյան մի շարք լրատվամիջոցների տեղեկություներով, Սարգսյանը օրեր առաջ իր մոտ էր կանչել Արարտում հանրապետականի մարզային կառույցի փոխնախագահ Գագիկ Բեգլարյանին և պահանջել էր նրանից աշխատել իր օգտին և մասնավորապես նախկին վարչապետ Հովիկ Աբրահամյանի մտերիմերի ու թիմակիցների դեմ։ Համաձայն տեղեկությունների տեղի է ունեցել շատ ծանր խոսակցություն, որից հետո Գագիկ Բեգլարյանի ինքնազգացողությունը վատացել էր, տեղափոխվել է հիվանդանոց, որտեղ էլ մահացել սրտի կաթվածից։
Ալիկ Սարգսյանն իրենց խոսակցության փաստը չի հերքել, սակայն բնականաբար նշել է, թե այդ խոսակցությունը ծանր չի եղել և որ Բեգլարյանն իր «100 տարվա ընկերն է»։ Իհարկե, թե ինչպիսին են ընեկրության մասին Ալիկ Սարգսյանի պատկերացումները դա իր անձնական գործն է, սակայն փաստն այն է, որ գլխապատառ քարոզարշավի մեջ որոշ գործիչներ պատրաստ են շրջանցել ցանկացած արժեք ու սկզբունք՝ մոռանալով, որ իրեն նույնպես ցանկացած պայի կարող են հայտնվել ռեժիմի զոհերի թվում՝ անկախ նրանից, թե ինչպիսի ջանասիրությամբ կփորձեն ապացուցել իրենց հավատարմությունը։
Չնայած այստեղ պետք է շեշտել, որ խնդիրը միայն կուսակցական հավատարմությունը չէ, այլ զուտ անձնական շահը, քանի որ մասնավորապես Ալիկ Սարգսյանը, ոստիկանապետ ու մարզպետ եղած տարիներին հասցրել էր «հետ գցել» ջերմոցներ, գազալցակայններ, հսկայական հողատարածքներ ու ռեստորաններ՝ և մարզում և մասնավորապես իր հայրենի Կանաչուտ գյուղում։ Թերևս հենց իր կալվածքների անվտանգությունն է փորձում ապահովագրել Ալիկ Սարգսյանն իր չափ ու սահման չճանաչող քարոզարշավով ու բոլոր թույլատրելի ու անընդունելի միջոցների կիրառումով։
Տիգրան Դավթյան