Ժիրինովսկին որոշել է կրկին նախագահ առաջադրվել. Ռեկորդ է սահմանելու
Ուշադրության կենտրոնումՌուսաստանի Լիբերալ-դեմոկրատական կուսակցության (ՌԼԴԿ) առաջնորդ Վլադիմիր Ժիրինովսկին այսօր հայտարարել է, որ ծրագրում է մյուս տարի մասնակցել նախագահական ընտրություններին: Այս մասին հայտնում է «ՌԻԱ Նովոստի»-ն:
«Այդ ընտրություններին ես կլինեմ կուսակցության թեկնածուն: Դա կլինի 6-րդ անգամ: Դա Եվրոպայի մասշտաբով ռեկորդ է: Եվրոպայում ոչ ոք 5 անգամից ավելի նախագահի թեկնածու չի առաջադրվել»,- ասել է Ժիրինովսկին: Քաղաքական գործիչն այս մասին հայտարարել է կուսակցության 30-րդ համագումարում, որի նախագահ է վերընտրվել առաջիկա 4 տարիների համար:
Անկախ քվեարկության արդյունքներից, կուսակցության առաջնորդը համոզված է, որ ՌԼԴԿ ներկայացուցիչները կմտնեն նոր կառավարության կազմի մեջ: «Կցանկանայի ՌԼԴԿ 30-րդ համագումարի ամբիոնից համոզվածություն հայտնել, որ հաջորդ տարվա մարտին նախագահական ընտրություններից հետո Ռուսաստանի հերթական կառավարությունը ձեւավորելիս կառավարության մեջ կլինեն նաեւ ՌԼԴԿ ներկայացուցիչները»,- նշել է նա: