Հայ-գերմանական համագործակցությունը նոր մեկնարկ է ստանում
Ուշադրության կենտրոնումՀայ-գերմանական համագործակցությունը նոր մեկնարկ է ստանում Բնակչության պաշտպանության եւ աղետների ռիսկի կառավարման ոլորտում:
Այսօր՝ հունվարի 30-ին ՀՀ արտակարգ իրավիճակների նախարարի ժամանակավոր պաշտոնակատար Հայկարամ Մխիթարյանն ընդունեց Գերմանիայի դաշնային հանրապետության կառավարության արտակարգ իրավիճակների գլխավոր հանձնակատար, դաշնային տեխնիկական օգնության բյուրոյի նախագահ Ալբրեխտ Բրյոմմեին:
Հանդիպման նպատակն էր քննարկել ՀՀ ԱԻ նախարարության եւ ԳԴՀ ներքին գործերի նախարարության տեխնիկական օգնության դաշնային բյուրոյի միջեւ արտակարգ իրավիճակների բնագավառում համագործակցության մասին փոխըմբռնման հուշագրի ստորագրումը: Քննարկմանը մասնակցում էր նաեւ ՀՀ-ում Գերմանիայի փոխդեսպան Նադյա Լիխտենբերգերը:
«Այսօր մեզ պատմական հնարավորություն է տրված նոր ու կայուն հիմքերի վրա դնելու հայ-գերմանական համագործակցությունը: 1988 թ.-ի Սպիտակի երկրաշարժի դասերի վերլուծության արդյունքում ձեւավորվեց INSARAG-ը (ՄԱԿ-ի միջազգային որոնողափրկարարական խորհրդատվական խումբ): Եվ ահա Սպիտակի երկրաշարժից 27 տարի անց Հայաստանն ուեւի INSARAG-ի բոլոր պահանջներին համապատասխանող թիմ: Մենք ունենք կայացած ու համագործակցելի կառույց, փորձառու եւ պրոֆեսիոնալ անձնակազմ, Սենդայից բխող ազգային ռազմավարություն, քաղաքական կամք ու մեծ պատրաստակամություն՝ համագործակցելու Գերմանիայի դաշնության հետ բնակչության պաշտպանության, աղետների ռիսկի կառավարման ոլորտում»,-ասել է Մխիթարյանը:
ԳԴՀ կառավարության ԱԻ գլխավոր հանձնակատար, դաշնային տեխնիկական օգնության բյուրոյի նախագահ Ա. Բրյոմմեն իր խոսքում անդրադարձավ Հայաստան կատարած առաջին այցելության նպատակի, ակնկալիքների եւ արտակարգ իրավիճակներում Հայաստանի ձեռքբերումներին:
Հյուրերը մասնակցեցին նաեւ ՀՀ ԱԻ նախարարության սայլակավոր հաշմանդամ աշխատակիցների պարգեւատրման արարողությանը:
Քանի որ Ալբրեխտ Բրյոմմեի այցը նաեւ ճանաչողական բնույթ էր կրում, Հ. Մխիթարյանի ուղեկցությամբ հյուրերը շրջեցին ՀՀ արտակարգ իրավիճակների նախարարությունում, եղան Ճգնաժամային կառավարման ազգային կենտրոնում՝ տեղում ծանոթանալով «911» ծառայության աշխատանքներին:
Նշենք, որ ՀՀ ԱԻ նախարարությունը եւ ԳԴՀ ներքին գործերի նախարարության տեխնիկական օգնության դաշնային բյուրոն, ընդունելով իրենց պետությունների միջեւ արտակարգ իրավիճակների բնագավառում համագործակցության կարեւորությունը, բնակչության անվտանգության եւ կայուն տնտեսական զարգացման ապահովման նպատակով համաձայնեցված աշխատանքների անցկացման անհրաժեշտությունը, բնական եւ տեխնածին բնույթի արտակարգ իրավիճակների կանխման ու հետեւանքների վերացման, տուժած բնակչությանն օգնություն ցույց տալու միջոցառումների իրականացման համար մարդկային, գիտատեխնիկական, տեխնոլոգիական եւ տեղեկատվական ռեսուրսների համատեղ օգտագործման անհրաժեշտությունը եւ նպատակ ունենալով առավել ամրապնդել փոխըմբռնումն ու բարեկամական համագործակցությունը, պայմանավորվում են այս Հուշագրով, իրենց երկրների օրենսդրությանը եւ միջազգային իրավունքի հանրաճանաչ սկզբունքներին ու նորմերին համապատասխան համագործակցություն իրականացնել հետեւյալ բնագավառներում.
1. կամավոր փրկարարական շարժումների կազմակերպում եւ ակտիվացում,
2. արտակարգ իրավիճակների կանխում եւ կանխարգելում, բնակչության եւ տարածքների պաշտպանություն, որոնողափրկարարական աշխատանքների կազմակերպում եւ իրականացում,
3. բնական եւ տեխնածին աղետների կանխարգելում, հետեւանքների վերացում,
4. վտանգավոր տեխնածին գործընթացների եւ բնական աղետների մոնիթորինգի կազմակերպում եւ իրականացում,
5. տեղեկատվության եւ նորարարական տեխնոլոգիաների փոխանակում,
6. համագործակցություն աղետներից տուժած բնակչության եւ փրկարարական աշխատանքներ իրականացնող անձնակազմերի հոգեբանական աջակցության կազմակերպման ծառայությունների միջեւ,
7. կողմերի լիազոր մարմինների պատվիրակությունների պարբերական փոխայցելություններ` փորձի փոխանակման նպատակով,
8. կողմերի` արտակարգ իրավիճակների ոլորտի աշխատողների եւ փորձագետների մասնագիտական որակավորման հետագա բարձրացման եւ վերապատրաստման ուղղությամբ համատեղ միջոցառումների (գիտաժողովներ, սեմինարներ, դասախոսություններ, վարժանքներ, գործնական պարապմունքներ) կազմակերպում եւ անցկացում` պլանավորված հատկացումների, մասնավոր ներդրումների եւ դրամաշնորհային միջոցների հաշվին,
9. համատեղ ծրագրերի մշակում եւ իրականացում: