Սթոլթենբերգ. ՆԱՏՕ-ին Չեռնոգորիայի անդամակցության ընթացակարգը ավարտական փուլում է
ՔաղաքականությունՆԱՏՕ-ին Չեռնոգորիայի անդամակցության ընթացակարգը ավարտական փուլում է, Հյուսիսատլանտյան դաշինք երկրին ընդունելու պայմանագիրը կվավերացվի առաջիկայում: Հունվարի 26-ին Բրյուսելում այս մասին հայտնել է ՆԱՏՕ-ի գլխավոր քարտուղար Յենս Սթոլթենբերգը: «Գործընթացը ընթանում է ըստ պլանի, Չեռնոգորիան դաշինքին կմիանա ամենամոտ ապագայում: ՆԱՏՕ-ին անդամացությունը կամրապնդի երկրի ինքնիշխանությունը»,- DW-ի փոխանցմամբ՝ ասել է նա:
Չեռնոգորիայի վարչապետ Դուշկո Մարկովիչը Սթոլթենբերգի հետ հանդիպման ավարտին հույս է հայտնել, որ իր երկիրն արդեն այս տարի Վարշավայում ՆԱՏՕ-ի գագթնաժողովին կմասնակցի որպես դաշինքի լիիրավ անդամ: Նա դժգոհել է անդամացության հասնելու ճանապարհին Չեռնոգորիայի իշխանությունների վրա գործադրված ճնշումներից: Մոսկվան քանիցս ելույթ է ունեցել ՆԱՏՕ-ի արեւելյան ընդարձակման դեմ եւ չեռնոգորցիներին սպառնացել է, որ կարձագանքի նրանց մերձեցմանը դաշինքին՝ ընդգծելով, որ դա շոշափում է ՌԴ-ի շահերը:
Չեռնոգորիան կդառնա Հյուսիսատլանտյան դաշինքի 29-րդ անդամը: Նա պաշտոնապես կընդունվի, երբ փաստաթուղթը վավերացնեն բոլոր 28 անդամ երկրները: Սթոլթենբերգի խոսքով՝ այս պահին 21 երկրներ արդեն աջակցություն են հայտնել: Բացակայում է, մասնավորապես, ԱՄՆ Սենատի վավերացումը, սակայն ՆԱՏՕ-ի գլխավոր քարտուղարը Սենատի կողմից աջակցության համոզմունք է հայտնել:
ՆԱՏՕ-ին Չեռնոգորիայի անդամակցության արձանագրությունը ստորագրվել է 2016-ի մայիսի 19-ին: ՆԱՏՕ-ի գագաթնաժողովը տեղի կունենա Վարշավայում՝ 2017-ի հուլիսի 8-9-ը: