Հստակ ծրագրերի անորոշ գործարկումը
Վերլուծություն«ՄԻՐ» միջազգային հեռուստաալիքին տված հարցազրույցում ՀՀ վարչապետ Կարեն Կարապետյանը նշել է, թե Հայաստանն ունի կոռուպցիայի դեմ պայքարի հստակ ծրագիր և շատ լավ գիտի, թե ինչ պետք է անել այդ պայքարի համար։ Սակայն հենց այստեղ է թաքնված հայաստանյան իշխանությունների ամենամեծ «գաղտնիքը»։ Թերևս վարչապետը կամ կառավարությունը իրավամբ էլ ունեն կոռուպցիայի դեմ պայքարի լավագույն ծրագիրը՝ մշակված քայլերով, սկզբունքներով ու փուլերով։
Ոչ պակաս հստակ ծրագիր կարող են ունենալ երկրի տնտեսության, զարգացման համար, բարեփոխումների համար և այլն։ Ի դեպ պետք է նշել, որ սա չի նշանակում է, որ այս հստակ ու լավ ծրագրերից չունեին նախորդ վարչապետները կամ կառավարությունները։ Ըստ էության նրանք բոլորն էլ ունեցել են փայլուն ծրագրեր, ավելի լավագույնս պատկերացրել են, թե ինչ պետք է անել կոռուպցիայի դեմ պայքարելու և ընդհանրապես երկրում իրավիճակ փոխելու համար, սակայն մշտապես էլ հեռացել են մեծ հաշվով ձախողված։
Հենց այստեղից էլ ակնհայտ է դառնում մի բան, Հայաստանի կամ ՀՀ կառավարության խնդիրներները երբեք էլ չեն եղել ծրագրերի կամ երկրում առկա ռեալ իրավիճակի մասին տեղեկությունների պակասը, ամենամեծ խնդիրը մշտապես եղել են այդ ծրարգրերի իրականացումն ու երկրի իրավիճակից բխող գործնական քայլերը։
Հենց այս մասին է, որ պետք է մտածի վարչապետը և ոչ միայն վարչապետը, այլև պետական կառավարման օղակի բոլոր ծառայողները, քանի որ ըստ էության ներկայիս իշխանության բոլոր օղակների ներկայացուցիչները բոլորից լավ գիտեն այն խնդիրները, որոնց առջև ներկայումս հայտնվել է երկիրը, բոլորից լավ գիտեն այդ խնդիրների արմատներն ու ծագումնաբանությունը և բնականաբար շատ լավ պատկերացնում են, թե առնվազն ինչպես չպետք է կառավարել երկիրը։ Սակայն այս պատկերացումները մնում են լոկ վերացականության սահմաններում։
Ուստի այս տեսանկյունից պետք է արձանագրել և գուցե նաև հուշել վարչապետին ու պետական ապարատի բոլոր օղակներին, Հայաստանի խնդիրները ծրագրերը չեն, այդ խնդիրները գտնվում են հենց իշխանության մեջ՝ բոլորի աչքի առաջ և դրանց լուծումը հնարավոր է միայն այն դեպքում, երբ իշխանության բոլոր օղակները կունենան ցանկություն և իհարկե քաղաքական կամք խնդիրներին դեմառդեմ հայտնվելու համար։
Աղասի Մարգարյան
PressMedia.am վերլուծաբան