Պետք է խուսափենք ՀՀ-ԵՄ բանակցություններն արագացնելուց. հարցեր կան, որոնք խորհելու կարիք ունեն. Սվիտալսկի
ՔաղաքականությունՀայաստան-ԵՄ համաձայնագրի բանակցություններում խնդիրները կապված են ԵՏՄ-ին ՀՀ անդամակցության հետ: Այս մասին այսօր՝ հունվարի 24-ին, լրագրողների հետ հանդիպման ժամանակ նշել է Հայաստանում Եվրամիության պատվիրակության ղեկավար, դեսպան Պյոտր Սվիտալսկին:
Նրա խոսքով, ապրիլին կայանալիք խորհրդարանական ընտրությունները չեն խանգարի ՀՀ-ԵՄ բանակցություններին, քանի որ Եվրամիությունը կաշկանդված չէ Հայաստանի ներքաղաքական օրացույցի զարգացումներով: Սվիտալսկին նշեց, որ ՀՀ-ԵՌՄ բանակցություններում առաջընթացը տպավորիչ է. «Բավական սահմանափակ են լուծում պահանջող խնդիրները: Հեռանկար կա քննարկումը մոտակա շաբաթների տեսքի բերելու համար: Ժամկետների մասին, չեմ ցանկանա ենթադրություններ անել, բայց մենք պատրաստ ենք ջանքեր գործադրել, որ համաձայնագրի վերջնական տեսքի բերելու համար ժամանակը բավական կարճ լինի»:
Հարցին, թե ի՞նչն է խանգարում հենց վաղը ստորագրել շրջանակային համաձայնագիրը, Պյոտր Սվիտալսկին պատասխանեց. «ԵՄ չափանիշներով շրջանակային համաձայնագրի շուրջ բանակցությունների տեմպը շատ բարձր է եղել: Գուցե հայկական դիտանկյունից այլ տպավորություն է, բայց ԵՄ տեսանկյունից բանակցությունները արագ են եղել: Թերևս, չլուծված խնդիրներ կան, բաց են, ինչ-որ առումով քաղաքականապես այդքան դժվար լուծելի չեն: Բայց ինչպես գիտեք կան խնդիրներ, որոնց համար ավելի երկար ժամանակ է պահանջվում: Գիտակցելով, որ կան չլուծված խնդիրներ, մենք պատճառ չենք տեսնում կասկածի տակ առնելու այդ հարցերի լուծելիությունը խելամիտ ժամկետում»:
Նա ընդգծել է, որ այդ խնդիրներն ի հայտ եկան 2013-ից հետո, երբ Հայաստանն ընտրեց ԵՏՄ անդամակցության ճանապարհը և դադարեցվեց Ասոցացման համաձայնագրի շուրջ բանակցությունը. «Խնդիրներ կապված են ԵՏՄ-ին ՀՀ անդամակցության հետ, որոշ այլ զարգացումներ հետ նաև: ԵՄ կողմից էլ ներդրումների պաշտպանության շուրջ քննարկումների հետ են կապված: Սրանք նոր գործոններ են հայկական կողմի համար, որոնց հարմարվել է պետք: Մենք պետք է խուսափենք գործընթացն արագացնելուց, որովհետև հարցեր կան, որոնք խորհելու կարիք ունեն»: