Առաջին ընդդիմադիրը լինելու մասին

«Ելք» դաշինքի առաջին համաժողովից հետո, պատասխանելով լրագրողների հարցերին ԱԺ պատգամավոր Էդմոն Մարուքյանը նշել է, որ հնարավոր է հարկ լինի ասել, թե ով՝ ով է։ Այս հայտարարության մեջ ըստ էության գծագրվում է առաջիկա նախընտրական քարոզարշավի հիմնական առանցքը, որը լինելու է ոչ իշխանական ճամբարում հանդես եկող քաղաքական միավորների հակաքարոզչությունը միմյանց դեմ։ Ըստ էության սա նոր երևույթ չէ, քանի որ հայաստանյան գրեթե բոլոր ընտրություններում ընդդիմադիր ճամբարում կատաղի պայքար է գնացել առաջին կամ միակ ընդդիմադիրը համարվելու համար։

Անշուշտ, պետք է նշել, որ ներկայումս հայաստանյան քաղաքական դաշտում գործող տարբեր կուակցություններ և քաղաքական միավորներ բազմաթիվ հիմքեր են տալիս իշխանության նախագիծ համարվելու համար, սակայն մյուս կողմից, եթե ոչ իշխանական դաշտում հանդես եկող ուժերը սկսում են քարոզչություն տանել այս կետը ապացուցելու և բնականաբար մրցակից ընդդիմադիրներից ձայներ խլելու  համար, ապա ուշադրության կենտրոնից դուրս է մնում արդեն բուն իշխանության կուսակցությունը։

Ինչ խոսք, ցանկացած քաղաքական ուժ ինքն է որոշում ինչ մարտավարությամբ և ռազմավարությամբ հանդես գա, սակայն մյուս կողմից եթե քաղաքական ուժը սկսում է պայքար մղել առաջին ընդդիմադիրը լինելու կամ մրցակիցներից ավելի շատ ներկայացվածություն ունենալու համար, ապա այստեղ թերևս պետք է մոռանալ որևէ տեսակի իշխանափոխության մասին խոսելուց։ Ի դեպ պետք է նշել նաև, որ իշխանափոխության քողի տակ քարոզչությունը ամենամեծ պոպուլիզմն է , որին դիմում են արմատական ընդդիմադիրները, առավել ևս այն պարագայում և այդ քարոզչության ընթացում հիմնական քննադատության են սկսում ենթարկվել այսպես ասած կասկածելի ծագման ընդդիմադիրները։

Այս տեսանկյունից, չբացառելով նաև այն որ նման պրոյեկտ քաղաքական ուժերի առկայությունը, պետք է ասել, որ լավագույն  տարբերակը կլիներ այն, որ հայաստանյան ոչ իշխանական քաղաքական ուժերը որոշակի կոնսենսուսի գան միմյանց դեմ քարոզչություն չտանելու հարցում՝ անկախ միմյանց հանդեպ վերաբերմունքից։ Նման կոնսենսուսը կարող է բերել նաև որոշակի առանցքային հարցերում ոչ իշխանական ուժերի ընդհանուր հայտարարի՝ օրինակ ենթադրենք ընտրական գործընթացների վերահսկողության հարցում։

Արդյոք առաջիկայում մենք կտեսնենք նման զարգացումներ թե ոչ, կերևա առաջիկայում, սակայն պետք է նշել, որ ներկայումս էլ ընթացող գործընթացները նման կոնսենսուսի մեծ հույսեր չեն տալիս, ինչն արդեն իսկ յուրօրինակ կանաչ լույս է իշխանության կուսակցության համար։

Աղասի Մարգարյան

PressMedia.am վերլուծաբան