Կաշառք վերցնելու մեջ մեղադրվող դատավորի նկատմամբ բերման ենթարկելիս բռնություն է գործադրվել. փաստաբան
ՀասարակությունOպերատիվ-հետախուզական միջոցառումն իրականացնելիս ոչ համաչափ ուժ է կիրառվել 1000 դոլար կաշառք պահանջելու եւ ստանալու մեջ մեղադրվող Շենգավիթ վարչական շրջանի ընդհանուր իրավասության արդեն նախկին դատավոր Իշխան Բարսեղյանի նկատմամբ: Այս մասին այսօր` հունվարի 23-ին, լրագրողների հետ զրույցումասաց նրա շահերի պաշտպան Վարդուհի Էլբակյանը` նշելով, որ իր պաշտպանյալի մոտ բերանի խոռոչի հետ կապված խնդիրներն առաջացել են հենց այդ պատճառով:
«Նրա նկատմամբ ոչ համաչափ ուժ է կիրառվել, վնասվածքներ է ստացել: Գործի նյութերով չունենք` քանի հոգի է մասնակցել այդ օպերատիվ-հետախուզական միջոցառմանը, գիտենք այն, ինչ ներկայացնում է պարոն Բարսեղյանը: Որքանով որ տեղյակ եմ այդ գործողությունը եղել է գետնանցումից դուրս գալուց հետո, բերման ենթարկելու ժամանակ: Այդ մասին պարոն Բարսեղյանն էլ է հայտարարություն արել, որ բռնության է ենթարկվել բերման ենթարկվելու ժամանակ»:
Վարդուհի Էլբակյանը նշել էր, որ Իշխան Բարսեղյանը բերանի խոռոչի փոքր վիրահատության է ենթարկվել` ատամնաշարի հետ խնդիր ունենալու պատճառով:
Նշենք, որ այսօր քրեական գործով դատական նիստը հետաձգվեց` ամբաստանյալ Իշխան Բարսեղյանի դատարան չներկայանալու հիմքով:
Իշխան Բարսեղյանին մեղադրանք է առաջադրվել ՀՀ քրեական օրենսգրքի 311-րդ հոդվածի 4-րդ մասի 3-րդ կետով՝ Կաշառք ստանալը: Կաշառքի միջնորդություն կատարելու համար փաստաբան Էլզա Զաքարյանին էլ մեղադրանք է առաջադրվել ՀՀ քրեական օրենսգրքի 313-րդ հոդվածի 1-ին մասով՝ Կաշառքի միջնորդությունը: Իշխան Բարսեղյանի նկատմամբ մինչդատական վարույթում որպես խափանման միջոց ընտրվել էր կալանավորումը:
Նշենք, որ ըստ ԱԱԾ տարածած հաղորդագրության՝ քաղաքացիական գործով կողմի օգտին որոշում կայացնելու համար դատավորը պահանջել եւ Երեւանի հետիոտնային գետնանցումներից մեկում անձամբ ստացել է 1000 ԱՄՆ դոլար գումար, որի փոխանցումն իրականացվել է Ազգային անվտանգության ծառայության աշխատակիցների օպերատիվ վերահսկողության ներքո:
Կաշառք տալու պահը տեսագրվել է եւ տարածվել: