Կաթոլիկ եւ Արեւելյան Ուղղափառ եկեղեցիները կքննարկեն ծիսական-աստվածաբանական առանձնահատկությունները
ՀասարակությունՀռոմում հունվարի 22-ին մեկնարկել է Կաթոլիկ-Արեւելյան Ուղղափառ միջեկեղեցական երկխոսության միջազգային աստվածաբանական միացյալ հանձնախմբի թվով տասնչորսերորդ նիստը. Հանձնախմբի աշխատանքները կընթանան մինչեւ հունվարի 28-ը:
Մայր Աթոռի տեղեկատվական համակարգից NEWS.am-ին հայտնում են, որ երկխոսության համար նախատեսված աստվածաբանական թեման է «Ս. Հաղորդության խորհուրդը եւ Եկեղեցին»: Նիստի ընթացքում միացյալ հանձնախմբի 26 անդամները քննարկելու են երկու եկեղեցական ընտանիքներում Ս. Հաղորդության խորհրդի պատմական զարգացումը, ծիսական-աստվածաբանական առանձնահատկությունները եւ եկեղեցաբանական արտահայտումները:
Գարեգին Բ Ծայրագույն Պատրիարք եւ Ամենայն Հայոց Կաթողիկոսի օրհնությամբ Մայր Աթոռ Սուրբ Էջմիածնից հանձնախմբի աշխատանքներին պաշտոնապես մասնակցում են ԱՄՆ Հայոց Արեւելյան թեմի առաջնորդ Գերաշնորհ Տ. Խաժակ արքեպիսկոպոս Պարսամյանը եւ Մայր Աթոռ Սուրբ Էջմիածնի Միջեկեղեցական հարաբերությունների բաժնի տնօրեն Հոգեշնորհ Տ. Շահե Ծ. վարդապետ Անանյանը:
Հայոց Եկեղեցում Ս. Հաղորդության խորհրդի ծիսական-աստվածաբանական առանձնահատկությունները ներկայացվելու են «Ս. Հաղորդության խորհրդի պատմական զարգացումը. Ս. Պատարագի եւ Եկեղեցու աստվածաբանական առնչակցությունները Հայաստանյայց Առաքելական Եկեղեցու ավանդության մեջ» խորագրով զեկույցում: