«Դատապարտյալների հիվանդանոցը» կփակվի
ՀասարակությունԱրդարադատության նախարարությունը մշակել է առաջարկներ, որոնք ուղղված են քրեակատարողական հիմնարկներում բժշկական ծառայությունների արդիականացմանը:
«Ազատությունից զրկված անձանց երկրորդային մասնագիտական բժշկական օգնությունը տրամադրել միայն քաղաքացիական հիվանդանոցներում և փակել «Դատապարտյալների հիվանդանոց» ՔԿՀ-ն, վերազինել «Դատապարտյալների հիվանդանոցը» և այն վերափոխել որոշակի մասնագիտական ձևով բժշկական օգնություն և սպասարկում մատուցող հաստատության», - նախագիծը ներկայացնելիս ասաց ՀՀ արդարադատության նախարար Արփինե Հովհաննիսյանը:
Նրա խոսքով՝ հայեցակարգով առաջարկվում է նաև վերանայել պատիժը կրելուն խոչընդոտող ծանր հիվանդությունների ցանկը, բողոքարկման ընթացակարգերը, ծանր հիվանդության հետևանքով պատժից ազատելու ընթացակարգի իրավական կարգավորումները՝ նախատեսելով բժշկի եզրակացության կամ հիվանդ ազատազրկված անձի (նրա ներկայացուցչի) դիմումի հիման վրա հարցն անմիջապես միջգերատեսչական հանձնաժողովի քննարկմանը ներկայացնելու հնարավորություն։
«Նախատեսվում է մշակել նաև հացադուլ անողներին վերաբերող իրավական կարգավորումներ՝ հատկապես ուշադրություն դարձնելով հարկադիր սնուցմանը և հարկադիր բուժմանը», - ընդգծեց նախարարը:
Արփինե Հովհաննիսյանը նշեց, որ քրեակատարողական առողջապահության ինստիտուցիոնալ համակարգի առնչությամբ, որպես բարեփոխման հնարավոր տարբերակ, առաջարկվում է մշակել համապատասխան օրենսդրական փոփոխություններ՝ քրեակատարողական բուժօգնության ծառայությունը քրեակատարողական վարչության ենթակայությունից հանելու և այն կամ ՀՀ արդարադատության նախարարության, կամ ՀՀ Կառավարության անմիջական ենթակայությանը հանձնելու վերաբերյալ: