Վարդանաշենում գյուղի ակումբի վարիչը գործող գյուղապետի միակ մրցակիցն է
ՔաղաքականությունՓետրվարի 12–ին հերթական տեղական ինքնակառավարման մարմինների ընտրություններ տեղի կունենան Արագածոտնի մարզի Վերին Բազմաբերդ և Արմավիրի մարզի Վարդանաշեն համայնքներում: Ինչպես արդեն տեղեկացրել էինք նույն օրը ՏԻՄ ընտրություններ կլինեն նաև Արարատի մարզի Նոյակերտ, Կոտայքի մարզի Նուռնուս, Շիրակի մարզի Ախուրիկ ու Արևիկ և Սյունիքի մարզի Վարդավանք համայնքներում:
Շիրակի մարզի Արևիկ և Սյունիքի մարզի Վարդավանք համայնքներում կլինեն արտահերթ ընտրություններ, քանի որ երկու համայնքի գյուղապետներն էլ մահացել են նախորդ տարի: Նախորդ համարում արնդրադարձել ենք Նոյակերտ, Նուռնուս և Ախուրիկ համայնքներում առաջադրված թեկնածուներին, այս անգամ կներկայացնենք Վերին Բազմաբերդում և Վարդանաշենում առկա առաջադրումները:
Վերին Բազմաբերդում գյուղապետի երեք թեկնածու կա՝ ՀՅԴ–ական գործող գյուղապետ Արտաշես Սաֆարյանը և անկուսակցականներ` Գրիշա Գրիգորյանն ու Վարդգես Խաչատրյանը: Կենտրոնական ընտրական հանձնաժողովի կայքում հրապարակված փաստաթղթում վերջին երկուսի դիմաց իրենց աշխատավայրի վերաբերյալ տեղեկություններ չկան: Նշված է միայն, որ նրանք ինքնառաջադրմամբ են հանդես եկել: Դե իսկ գործող գյուղապետին էլ առաջադրել և աջակցում է «Դաշնակցությունը»:
Արմավիրի մարզի Վարդանաշեն համայնքում գյուղապետի միայն երկու թեկնածու կա՝ գործող գյուղապետ, ՀՀԿ–ական Արթուր Մանուկյանը և Վարդանաշենի գյուղապետարանի ակումբի վարիչ, անկուսակցական Սարգիս Բարսեղյանը: Գործող գյուղապետի կողքին, իր ենթակայության տակ աշխատողի առաջադրումը, ըստ երևույթին, ձևական բնույթ կարող է կրել՝ պայմանավորված մրցակցային պատկեր ապահովելու նպատակով: