Լարված իրավիճակ դատարանում. սպանված երիտասարդի մայրը ջրով բաժակը նետեց ամբաստանյալի վրա
Հասարակություն2015թ. դեկտեմբերի 24-ին Երեւանի Շենգավիթ համայնքում գործող «Գուդվին» բուքմեյքերական գրասենյակի աշխատակցի սպանության գործով նիստն այսօր` հունվարի 17-ին, մեկնարկել է միջադեպով:
NEWS.am-ի թղթակիցը Շենգավիթ վարչական շրջանի ընդհանուր իրավասության դատարանից հաղորդում է, որ սպանված Արթուր Նազարյանի մայրը մինչեւ նիստի մեկնարկը, տեսնելով ամբաստանյալին, սկսել է հայհոյել: Դատական կարգադրիչները ստիպված հեռացրել են կնոջը նիստերի դահլիճից: Այնուհետեւ արդեն դատավորի գալուց հետո սպանվածի մորը թույլ են տվել մասնակցել նիստին: Կինը, սակայն, կրկին չի կարողացել իրեն տիրապետել. Վերցրել է ջրով բաժակն ու նետել ամբաստանյալ Կարեն Շահինյանի ուղղությամբ: Ամբաստանյալին հեռացնելուց հետո կինը շարունակել է հայհոյել: Իրավիճակը մեղմելու համար դատարանն ընդմիջում է հայտարարել:
Ընդմիջումից հետո դատարանը վերադարձավ եւ որոշեց նիստը հետաձգել:
Ըստ մեղադրական եզրակացության՝ նախկինում դատված Կարեն Շահինյանը դեպքի օրը խաղադրույքներ է կատարել եւ պարտվելուց հետո շահադիտական դրդումներով, այն է՝ ընկերության գրասենյակում գտնվող չհրկիզվող պահարանից գումար հափշտակելու նպատակով սպանել է հիշյալ գրասենյակի աշխատակից Արթուր Նազարյանին:
Նազարյանին մեղադրանք է առաջադրվել Քրեական օրենսգրքի 104-րդ հոդվածի 2-րդ մասի 8-րդ կետով, այն է՝ սպանություն, որը նախատեսում է ազատազրկում՝ 12-20 տարի ժամկետով կամ ցմահ ազատազրկում:
Նշենք, որ Կարեն Շահինյանը դեպքից հետո գտնվում էր հետախուզման մեջ, նա հայտնաբերվել է Ռուսաստանում եւ Հայաստան է տեղափոխվել 2016թ. սեպտեմբերին: Նա կալանավորված է։