Ռումինիայի նախկին նախագահը դատարանում վիճարկում է իրեն Մոլդովայի քաղաքացիությունից զրկելու մասին հրամանագիրը
ՄիջազգայինՌումինիայի նախկին նախագահ Տրայան Բասեսկուն փորձում է դատարանում վիճարկել իրեն Մոլդովայի քաղաքացիությունից զրկելու մասին այդ երկրի նախագահ Իգոր Դոդոնի հրամանագիրը:
«Մոլդովայի լավագույն փաստաբանին եմ փնտրում: Վեց ամիս ժամանակ ունեմ: Հրամանագիրն ուժի մեջ է մտնում վեց ամիս անց, պետք է դատի տամ Դոդոնին»,- Բուխարեստում լրագրողներին հայտարարել է Բասեսկուն: Նրա խոսքով՝ Դոդոնը ժեստ է արել՝ «Մոսկվայի իր տիրոջը դուր գալու համար»: Այս մասին գրում է «Ինտերֆաքս»-ը:
Հիշեցնենք, որ 2016 թվականի դեկտեմբերի 23-ին պաշտոնը ստանձնած Մոլդովայի ռուսամետ նախագահ Իգոր Դոդոնը հունվարի 3-ին Բասեսկուին երկրի քաղաքացիությունից զրկելու մասին հրամանագիր է ստորագրել:
«Նախկինում, որպես Մոլդովայի խորհրդարանի պատգամավոր, ես ասել եմ, որ պարոն Բասեսկուին քաղաքացիություն է շնորհվել ապօրինաբար: Նա բազմիցս կոչ է արել վերացնել Մոլդովայի պետականությունը՝ այն միացնելով Ռումինիային: Ռումինիայի նախագահի պաշտոնում նա հրաժարվել է ճանաչել Մոլդովայի պետականությունն ու մոլդովացի ժողովրդին: Այս ամենը կոպտորեն հակասում է Մոլդովայի Սահմանադրությանը»,- Facebook-ում գրել է Դոդոնը :