Օպտիմալացումը շարունակվում է
BlogՄիքայել Գրիգորյանը ֆեյսբուքյան իր էջում գրում է .
Պետական կառավարման համակարգի օպտիմալացման աշխատանքները շարունակվում են:
Դեռ 1-2 շաբաթ առաջ որոշ ՊՈԱԿ-ներ վերակազմավորվեցին, որի հետևանքով զգալի միջոցներ կտնտեսվեն: Ընդհանուր պետական համակարգը ավելի մոբիլ և օպտիմալ դարձնելը այսօր առաջնահերթություն է կառավարության համար: Արյունավետ կառավարման համար անհրաժեշտ է ունենալ պատասխանատվության հստակ բաշխում:
Եթե համակարգում առկա են երկու կամ նույնիսկ երեք նույնանման գործառույթ իրականացնող պետական հիմնարկներ, ապա այդ դեպքում արդյունավետ կառավարումը ուղղակի անհնարին է դառնում: Դեպքեր կան, երբ քաղաքացիները չեն կարողանում հասկանալ, թե որ հիմնարկ պետք է դիմեն, քանի որ երկու տեղ դիմելու դեպքում էլ ստանում են նույնանման պատասխան: Նմանատիպ խնդիրները պետք է օր առաջ վերանան:
Այսօր կառավարության որոշմամբ նախատեսվել է «Հյուսիս-հարավ ճանապարհային միջանցքի ներդրումային ծրագրի իրականացման կազմակերպություն» ՊՈԱԿ-ը և «Տրանսպորտի ծրագրերի իրականացման գրասենյակ» պետական հիմնարկը վերակազմակերպել և ստեղծել «Տրանսպորտային ծրագրերի իրականացման կազմակերպություն» ՊՈԱԿ:
Վերոնշյալ կազմակերպություններն իրականացնում են ՀՀ-ում տրանսպորտի ոլորտի ծրագրերն ու աշխատանքները: Արդյունքում ֆինանսական միջոցները կօգտագործվեն հնարավորինս արդյունավետ. կկրճատվեն 3 մեքենա, 9 աշխատատեղ, կտնտեսվի մոտ 106.9 մլն ՀՀ դրամ:
Մեկ այլ որոշմամբ` առաջարկվել է ՀՀ բնապահպանության նախարարության միանգամից մի քանի ՊՈԱԿ վերակազմակերպել` ստեղծելով «Շրջակա միջավայրի մոնիթորինգի և տեղեկատվության կենտրոն» ՊՈԱԿ:
Արդյունքում կբարձրանա գործունեության արդյունավետությունը, կապահովվի պետբյուջեի միջոցների արդյունավետ օգտագործումը. կկրճատվի 21 հաստիք, կտնտեսվի 20 մլն ՀՀ դրամ:
Իսկ ՀՀ ԿԱ անշարժ գույքի կադաստրի պետական կոմիտեն առաջարկում է «Ուսումնամեթոդական կենտրոն» ՊՈԱԿ-ը միացման ձևով վերակազմակերպել «Գեոդեզիա և քարտեզագրություն» ՊՈԱԿ-ի՝ դրանց գործառույթների պահպանման ու օպտիմալացման նպատակով: Արդյունքում կկրճատվի 20 հաստիք և կտնտեսվի տարեկան մոտ 30 մլն ՀՀ դրամ:
Արդյունքում տնտեսված միջոցների հանրագումարը կազմում է մոտավորապես 151 մլն ՀՀ դրամ, որը բավականին մեծ գումար է: