Հայաստանում հյուրանոցների թվի աճ է գրանցվել
ՎերլուծությունԸստ ՀՀ ազգային վիճակագրական ծառայության հրապարակման՝ Հայաստանի հյուրանոցների թիվը 2015 թ. տվյալներով 523 է, իսկ դրանցում աշխատողների տարեկան միջին թվաքանակը կազմում է 4920 մարդ: Թվով 523 հյուրանոցային տնտեսություններ 2015 թ. 33 միլիարդ 953 միլիոն 400 հազար դրամի հասույթ են ունեցել:
2011–14 թթ. Հայաստանում գործող հյուրանոցների թիվը գրեթե չէր փոփոխվում` տարբեր տարիներին կազմելով 338, 377, 387 և 399: Եվ միայն 2015–ին այս թիվը ավելացավ ավելի քան 100–ով՝ դառնալով 523:
Ինչպես և կարելի է տրամաբանել, Հայաստանում ամենից շատ հյուրանոցներ գործում են մայրաքաղաքում: Այստեղ` 2015 թ. տվյալներով, հյուրանոցային տնտեսությունների թիվը կազմում է 296՝ ամբողջ հյուրանոցների թվի մոտ կեսը, որտեղ աշխատում է հանրապետության բոլոր հյուրանոցներում ներգրավված աշխատակիցների 73%–ը: Երևանն առաջատար է նաև հյուրանոցային բիզնեսի եկամուտների տեսանկյունից՝ մայրաքաղաքի բոլոր հյուրանոցները միասին 2015 թ. ունեցել են 29 միլիարդ 477 հազար դրամի հասույթ, ինչը Հայաստանի բոլոր հյուրանոցների հասույթի մոտ 87%–ն է կազմում:
Երևանին զիջում են Կոտայքի և Տավուշի մարզերը, որտեղ հյուրանոցների թիվը կազմում է համապատասխանաբար` 53 և 48: Այս մարզերում հյուրանոցների թվի գերակշիռ լինելը պայմանավորված է այդ մարզերում գտնվող և Հայաստանում զբոսաշրջության ու առողջարանային կենտրոններ համարվող մի շարք քաղաքների գոյությամբ, այնպիսիք, ինչպիսիք օրինակ` Դիլիջանը, Ծաղկաձորը և Հանքավանը: Թեև այս երկու մարզերում գործող հյուրանոցների թիվը միմյանց գրեթե հավասար են, սակայն Կոտայքի մարզի հյուրանոցային տնտեսություններում աշխատող մարդկանց թիվը կրկնակի շատ է, քան Տավուշի մարզում: Առաջինում այն 421 է, իսկ երկրորդում՝ 209:
Ամենից քիչ հյուրանոցներ կան Արմավիրի և Գեղարքունիքի մարզերում, առաջինում` 5, երկրորդում՝ 7: Սակայն այս թիվն էլ առաջընթաց է այս երկու մարզերի համար, քանի որ ընդամենը 3 տարի առաջ երկու մարզում էլ միայն 2 հյուրանոց կար: Հատկանշական է, որ Գեղարքունիքի մարզում, որտեղ 7 հյուրանոց կա, 2015 թ. տարեկան հասույթը կազմել է 203 միլիոն 100 հազար դրամ, իսկ Արմավիրում, ուր 5 հյուրանոց կա, տարեկան հասույթը հինգ անգամ ավելի քիչ է եղել՝ այն կազմել է 51 միլիոն 600 հազար դրամ:
Քրիստինա Տեր-Մաթևոսյան