Արտահանումը կդառնա տնտեսության լոկոմոտիվը
BlogԴավիթ Պետրոսյանն իր ֆեյսբուքյան էջում գրում է.
Այսօր ԱԺ-ում քննարկման է դրվել կառավարության ծրագիրը, որը, առավել քան որևէ այլ կառավարության ծրագիր, հասարակության լայն շերտերում հետաքրքրություն էր առաջացրել: Պետք է նշել, որ այս ծրագրի հետ շատերն են հույսեր կապում՝ տնտեսական ծանր իրավիճակից ելք տեսնելու առումով:
ԱԺ-ում ունեցած ելույթում Կարեն Կարապետյանն, անդրադառնալով տնտեսական խնդիրներին ու հատկապես ծրագրի տնտեսական բաղադրիչին, խոսել է բիզնեսի զարգացման հեռանկարների ու նախատեսվող քայլերի մաիսն: Նա կարևորել է ոչ ստանդարտ գործիքակազմի ու մեթոդների կիրառման անհրաժեշտությունը, քանի որ ստանդարտ մեթոդներով տնտեսական զարգացում ապահովելը չափազանց բարդ է:
Նա բիզնեսի զարգացման համար առանձնացրել է մի քանի կորևոր կետեր, ասելով. «մենք պետք է ՝
• վեր հանենք և վերացնենք երկրում ներդրումների իրականացումը և ձեռներեցության զարգացումը խոչընդոտող բոլոր վարչարարական արգելքներն ու ավելորդ ընթացակարգերը,
• ստանձնենք երկրում ներդրումային ակտիվություն խթանողի գործառույթը և անմիջականորեն մասնակցենք Հայաստանի համար առանցքային ներդրումային ծրագրերի իրականացմանը,
• աշխատենք միջազգային ներդրողների հետ, որպեսզի ապացուցենք, որ Հայաստանում բիզնեսով զբաղվելն ու ներդրումներ կատարելն ապահով են, անվտանգ և, պարզապես, շահավետ»։
Ինչպես և սպասվում էր, կառավարությունը մեծ կարևորություն է տվել նաև արտահանման զարգացմանը՝ որպես տնտեսության կարևորագույն ուղղություն:
«Հանրապետության տնտեսության կայուն աճի ապահովման նպատակով կառավարությունը դավանում է ազատական տնտեսության գաղափարախոսությունը և տնտեսության զարգացման հեռանկարը տեսնում է արտահանման աճի մեջ»,- հայտարարել է վարչապետը:
Թերևս այս ուղղությունն, իրոք, պետական հոգածության լուրջ կարիք ունի: Հաշվի առնելով նաև Հայաստանի կոմունիկացիոն խնդիրներն ու արտաքին շուկա դուրս գալու դժվարությունները, պետք է նշել, որ կառավարությունն այստեղ ավելի շատ անելիքներ ունի: