Ո՞վ է սպառնում Վիկտոր Դալլաքյանին
ՎերլուծությունԱզգային ժողովում Սերժ Սարգսյանի ներկայացուցիչ, երբեմն ընդդիմադիր և անկախ պատգամավոր Վիկտոր Դալլաքյանն այսօր մամուլի ասուլիսում հանդես է եկել սենսացիոն հայտարարությամբ՝ նշելով, թե հեռանում է պաշտոնից, դուրս է գալիս ՀՀԿ-ից և վերադառնում է ընդդիմադիր քաղաքական գործչի իր անփոփոխ սկզբունքին։
Առավել հետաքրքիր էր Վիկտոր Դալլաքյանի հայտարարության հաջորդ մասը, որտեղ նշում է, թե իր հայտարարություններից հետո, եթե իր անձին ու ընտանիքին վտանգ սպառնա, ապա պատասխանատուն ոչ ավել, ոչ պակաս, Սերժ Սարգսյանն է։ Դժվար է գուշակել, թե ինչ վտանգ կարող է սպառնալ Դալլաքյանին, այն էլ ուղղակիորեն Սերժ Սարգսյանի կողմից, սակայն դժվար չէ գուշակել, որ 2017-ի ընտրություններից առաջ հայաստանյան իշխանական վերնախավը հետևողական կերպով քաղաքական դաշտը սկսում է լցնել փսևդոընդդիմադիր կուսակցություններով ու գործիչներով, որոնք օգտագործվել են բազմիցս, ինչին ականատես եղանք նաև Վանաձորում։
Հետաքրքիր է, սակայն, թե ինչու ընդդիմադիր դաշտ մտնելուց առաջ Դալլաքյանն իր անունը չի փոխում, ինչպես վարվեց ավանդաբար ընդդիմադիր և միաժամանակ իշխանության մշտական ու վստահելի հենարան, վերածնված կուսակցություններից մեկը։ Առավել ևս այն պայմաններում, երբ Դալլաքյանն անհանգստանում է իր անվտանգության համար, ավելի քան նպատակահարմար պահ է, որպեսզի հանրությանը ներկայանա որպես վերածնված ընդդիմադիր՝ համապատասխան անունով՝ ասենք Արտաշես Բաղդասարյան կամ որևէ նման այլ «հայեցի» անունով։
Նմանօրինակ սենսացիաների մեջ իրականում բավական անհանգստացնող միտումներ կան, քանի որ առանց այն էլ աննախանձելի վիճակում գտնվող հայաստանյան քաղաքական դաշտում հերթական անգամ թացն ու չորը խառնվելու է իրար, ինչից, որպես կանոն, հիմնական ու թերևս նաև միակ տուժողը Հայաստանի քաղաքացիներն են։ Այստեղ արդեն հայաստանյան շատ թե քիչ սկզբունքային կուսակցությունների համար առաջնային խնդիր է դառնում քաղաքական դաշտը մարգինալներից ու քաղաքական չարչիներից մաքրելու օրակարգը։
Աղասի Մարգարյան
PressМedia.am վերլուծաբան