Աղվան Հովսեփյանի անորոշ անելիքները
ՎերլուծությունՔննչական կոմիտեի նախագահ Աղվան Հովսեփյանը համոզված է, որ ինքը դեռ շատ անելիքներ ունի և չի պատրաստվում լքել պաշտոնը։ Անկախ նրանից, թե ինչ շշուկներ կան Աղվան Հովսեփյանի պաշտոնանկության մասին, առավել հետաքրքիր է, թե ինչ անելիքների մասին է խոսում Հովսեփյանը։
Ըստ էության Քննչական կոմիտեի ստեղծումը պարզունակ կերպով բյուրոկրատական ապարատի ուռճացում էր, քանի որ այն ստեղծվեց Աղվան Հովսեփյանին պարապ չթողնելու և իհարկե տարիներ շարունակ ՀՀ Գլխավոր դատախազի պաշտոնում իշխանության մամլիչի դերակատարության համար։Թերևս հայաստանյան հանրությունը չի մոռացել Աղվան Հովսեփյանի կատարած ծառայությունը 2008 թվականի մարտի մեկի և դրան հաջորդած իրադարձություններում Հովսեփյանի ռեժիսուրայով իրականացված դատական գործընթացներն ու ընդդիմության հալածանքները։
Գուցե առաջիկայում Աղվան Հովսեփյանը հույս ունի, որ կրկին իր ծառայությունների անհրաժեշտությունը կզգացվի, դժվար է ասել։ Մյուս կողմից, կարծես թե ներկայումս հայաստանյան քաղաքական և ոչ միայն քաղաքական գործընթացներն ընթանում են այլ հունով, քանի որ առնվազն արտաքուստ մենք ականատես ենք սկզբունքորեն նոր զարգացումների, որոնք բավական հեռու են հերթական մարտի 1-ին հանգելուց։
Նման պայմաններում շարունակում է օդից կախված մնալ Աղվան Հովսեփյանի շատ ու քիչ անելիքների հարցը, քանի որ հենց այս տիպի գործիչների հեռացումից է կախված, թե ինչպիսի ընթացք, զարգացում և արդյունք կունենան ներկայումս նախաձեռնված բարեփոխումները։
Աղասի Մարգարյան
PressМedia.am վերլուծաբան